കാസര്കോട്: തിരുവനന്തപുരം കോര്പ്പറേഷന് മേയര്, ഡെപ്യൂട്ടി മേയര് ഉള്പ്പെടെയുള്ള ബിജെപി കൗണ്സിലര്ക്കെതിരെ അക്രമം അഴിച്ചുവിട്ട സിപിഎമ്മിന്റെ നടപടിക്കെതിരെ ബിജെപി ജില്ലാ കമ്മിറ്റിയുടെ ആഭിമുഖ്യത്തില് കാസര്ഗോഡ് നഗരത്തില് പ്രതിഷേധ പ്രകടനവും ധര്ണ്ണയും സംഘടിപ്പിച്ചു. ബിജെപി ജില്ലാ പ്രസിഡന്റ് അശ്വിനി എംഎല് ഉദ്ഘാടനം ചെയ്തു.
സിപിഎമ്മിന് സംസ്ഥാന ഭരണം നഷ്ടപ്പെട്ടതിലും കൂടുതല് ആശങ്കയും അസ്വസ്ഥതയും തിരുവനന്തപുരം കോര്പ്പറേഷന് ഭരണം നഷ്ടപ്പെട്ടതിലാണെന്ന് അശ്വിനി പറഞ്ഞു. അനധികൃത കെട്ടിടങ്ങള് പൊളിച്ചു നോക്കിയതും മേയര് ഓഫീസിന്റെ പ്രവര്ത്തനം കൂടുതല് ജനകീയമാക്കിയതും സിപിഎമ്മിനെ വിറളി പിടിപ്പിച്ചുവെന്നും ബിജെപി ഭരണം പിടിക്കുന്നിടത്ത് സിപിഎമ്മിന് ഇനി തിരിച്ചുവരവില്ല എന്ന തിരിച്ചറിവും സിപിഎം അക്രമത്തിന് കാരണമാണെന്ന് അശ്വിനി കൂട്ടിച്ചേര്ത്തു.
ബിജെപി ജില്ലാ ജനറല് സെക്രട്ടറിമാരായ മനുലാല് മേലത്ത്, എന്. ബാബുരാജ്, പി. ആര്. സുനില്, ഒബിസി മോര്ച്ച സംസ്ഥാന ജനറല് സെക്രട്ടറി കെ.എസ്. ഷൈബു, ജില്ലാ സെല് കോര്ഡിനേറ്റര് സുകുമാര് കുദ്രെപ്പാടി, ഒബിസി മോര്ച്ച ജില്ലാ ജനറല് സെക്രട്ടറി ദയാനന്ദ കുലാല്, ജില്ലാ വൈസ് പ്രസിഡന്റ് ടിവി മുരളി, മഹിളാ മോര്ച്ച ജില്ലാ ജനറല് സെക്രട്ടറി അനിതാ നായിക് ഉള്പ്പെടെയുള്ള മുതിര്ന്ന നേതാക്കള് നേതൃത്വം നല്കി.
