മുഖ്യമന്ത്രി പിണറായി വിജയന്റെ സാന്നിധ്യത്തില്‍ തന്നെ അദ്ദേഹത്തെ പുകഴ്ത്തുന്ന പരാമര്‍ശങ്ങളുള്ള ഗാനം ആലപിച്ച് കേരള സെക്രട്ടറിയേറ്റ് എംപ്ലോയീസ് അസോസിയേഷന്‍. മുഖ്യമന്ത്രിക്കായുള്ള വാഴ്ത്ത്പാട്ട് മുഖ്യമന്ത്രിയുടെ സാന്നിധ്യത്തില്‍ പാടില്ലെന്ന് സെക്രട്ടറിയേറ്റ് എംപ്ലോയീസ് അസോസിയേഷന്‍ നേരത്തെ അറിയിച്ചിരുന്നു. എന്നാല്‍ സെന്‍ട്രല്‍ സ്റ്റേഡിയത്തില്‍ ഗാനം ആലപിച്ചുകൊണ്ടിരിക്കുമ്പോഴാണ് മുഖ്യമന്ത്രി എത്തിയത്.
‘പടയുടെ പടനായകനായി’ എന്ന് മുഖ്യമന്ത്രിയെ വിശേഷിപ്പിച്ചെഴുതിയ സംഘഗാനമാണ് സെക്രട്ടേറിയേറ്റിലെ 100 വനിതാ ജീവനക്കാര്‍ കേരള സെക്രട്ടേറിയറ്റ് എംപ്ലോയീസ് അസോസിയേഷന്‍ സുവര്‍ണ ജൂബിലി മന്ദിരത്തിന്റെ ഉദ്ഘാടനത്തിന് മുഖ്യമന്ത്രിയെ വേദിയിലിരുത്തി ആലപിച്ചത്.
കേരളത്തിലെ സര്‍വ്വീസ് മേഖല അസ്വസ്ഥതമായ കാലം ഉണ്ടായിരുന്നുവെന്ന് മുഖ്യമന്ത്രി പറഞ്ഞു. സര്‍വ്വീസ് മേഖല സംഘടനകള്‍ ജീവനക്കാരുടെ അവകാശങ്ങള്‍ക്കും ആനുകൂല്യങ്ങള്‍ക്കും സമരം ചെയ്തു. ഇന്നത്തെ പുതിയ തലമുറ ഇക്കാര്യങ്ങള്‍ മനസിലാക്കണം എന്നില്ല.
കഴിഞ്ഞ കാല പ്രവര്‍ത്തന ചരിത്രവും പ്രയാസങ്ങളും ത്യാഗങ്ങളും നിറഞ്ഞതാണ്. അക്കാര്യങ്ങള്‍ പുതു തലമുറയ്ക്ക് പകര്‍ന്ന് കൊടുക്കാന്‍ കഴിയണം എന്നാല്‍ മാത്രമെ ഇന്ന് അനുഭവിക്കുന്ന അവകാശങ്ങള്‍ നേടിയത് എങ്ങനെയെന്ന് അറിയാന്‍ കഴിയൂ.
KSEA സാമൂഹ്യ രംഗത്തും ഇടപെട്ട സംഘടനയാണ്. ചില ദുരന്തങ്ങള്‍ ഘട്ടങ്ങളിലെല്ലാം നാടിനും നാട്ടുകാര്‍ക്കൊപ്പവും പ്രവര്‍ത്തിക്കാന്‍ സംഘടനയ്ക്ക് കഴിഞ്ഞു. സര്‍വീസ് രംഗത്തെ സംഘടനകളുടെയെല്ലാം ചരിത്രം അതാണെന്നും മുഖ്യമന്ത്രി പറഞ്ഞു.
അതേസമയം കുറ്റപ്പെടുത്തലുകള്‍ക്കും അധിക്ഷേപത്തിനും ആരോപണങ്ങള്‍ക്കുമിടയില്‍ ഒരു പുകഴ്ത്തല്‍ വരുമ്പോള്‍ മാധ്യമങ്ങള്‍ അസ്വസ്ഥരാകുന്നു എന്നാണ് മുഖ്യമന്ത്രി വാര്‍ത്താസമ്മേളനത്തില്‍ വാഴ്ത്തു പാട്ടുമായി ബന്ധപ്പെട്ട ചോദ്യത്തിന് മറുപടി നില്‍കിയത്. വ്യക്തി പൂജയ്ക്ക് നിന്ന് കൊടുക്കില്ലെന്നും മുഖ്യമന്ത്രി വ്യക്തമാക്കി
