മുഖ്യമന്ത്രിയുമായി കൂടിക്കാഴ്ച നടത്തി: നിരാഹാര സമരം തുടരുമെന്ന് ശ്രീജിത്ത്

തിരുവനന്തപുരം: മുഖ്യമന്ത്രിയുമായുള്ള കൂടിക്കാഴ്ചയ്ക്ക് ശേഷവും മരണം വരെ സമരം തുടരുമെന്ന നിലപാടിലുറച്ച് ശ്രീജിത്ത്. ചര്‍ച്ചയ്ക്ക് ശേഷം മാധ്യമങ്ങളെ കണ്ട ശ്രീജിത്ത് താന്‍ നിരാഹാര സമരം തുടരുമെന്ന് അറിയിച്ചു.

എല്ലാം ചെയ്തിട്ടുണ്ടെന്നും പരിപൂര്‍ണ്ണ പിന്തുണയുണ്ടെന്നും പറയുകയല്ലാതെ വിഷയത്തില്‍ ഒന്നും ചെയ്യാന്‍ കഴിയില്ലെന്ന് മുഖ്യമന്ത്രി പറഞ്ഞതായി ശ്രീജിത്ത് മാധ്യമങ്ങളോട് പറഞ്ഞു.

എല്ലാം സഹായവും ചെയ്യാമെന്നാണ് മുഖ്യമന്ത്രി അറിയിച്ചത്. കമ്മീഷന്‍ റിപ്പോര്‍ട്ട് പ്രകാരമുള്ള കുറ്റവാളികളെ മാറ്റിനിര്‍ത്താന്‍ കഴിയില്ലെന്ന് മുഖ്യമന്ത്രി അറിയിച്ചു. കോടതിയുടെ സ്റ്റേയുള്ളതാണ് തടസ്സമെന്നാണ് മുഖ്യമന്ത്രി അറിയിച്ചത്. കോടതിയുടെ സ്റ്റേയില്‍ കക്ഷി ചേരുകയോ വേണ്ട നടപടികള്‍ കൈക്കൊള്ളുകയോ ചെയ്യാമെന്നും മുഖ്യമന്ത്രി പറഞ്ഞു. അതിനാല്‍ നടപടിയുണ്ടാവുന്നതുവരെയും സി.ബി.ഐ അന്വേഷണത്തിന് ഉത്തരവ് വരുന്നതുവരെയും സമരം തുടരുമെന്ന് ശ്രീജിത്തിനൊപ്പം വന്ന സാമൂഹ്യ പ്രവര്‍ത്തകര്‍ അറിയിച്ചു.