കര്‍ണാടകയിലെ ബീദറില്‍ വന്‍ എടിഎം കൊള്ള. സുരക്ഷാ ജീവനക്കാരനെ കൊലപ്പെടുത്തിയാണ് കവര്‍ച്ച നടത്തിയത്. ബീദറിലെ എസ്ബിഐ ശാഖക്ക് മുന്നിലെ എടിഎമ്മിലാണ് കവര്‍ച്ച നടന്നത്.
ബെംഗളൂരു: കര്‍ണാടകയിലെ ബീദറില്‍ വന്‍ എടിഎം കൊള്ള. സുരക്ഷാ ജീവനക്കാരനെ കൊലപ്പെടുത്തിയാണ് കവര്‍ച്ച നടത്തിയത്. ബീദറിലെ എസ്ബിഐ ശാഖക്ക് മുന്നിലെ എടിഎമ്മിലാണ് കവര്‍ച്ച നടന്നത്. ബീദറിലെ ജില്ല ഹെഡ് ക്വാര്‍ട്ടേഴ്‌സിലുള്ള എസ്ബിഐയുടെ എടിഎമ്മിലാണ് വന്‍ കൊള്ള നടന്നിരിക്കുന്നത്. ബാങ്കിന്റെ തൊട്ടടുത്ത് തന്നെയുള്ള എടിഎമ്മാണിത്. ബാങ്കിന്റെ ബ്രാഞ്ചില്‍ നിന്ന് 93 ലക്ഷം രൂപ എടിഎമ്മിലേക്ക് നിറക്കാന്‍ കൊണ്ടുവന്നിരുന്നു. ആ സമയത്താണ് ബൈക്കിലെത്തിയ രണ്ട് അക്രമികള്‍ എടിഎമ്മിന് നേരെ ആക്രമണം നടത്തിയത്. സെക്യൂരിറ്റി ഗാര്‍ഡിനെ വെടിവെച്ച് കൊലപ്പെടുത്തിയാണ് കവര്‍ച്ച നടത്തിയത്.
ബീദര്‍ സ്വദേശിയായ ഗിരി വെങ്കിടേഷാണ് കൊല്ലപ്പെട്ടത്. അക്രമികള്‍ എട്ട് റൗണ്ട് നിറയൊഴിച്ചുവെന്ന് പൊലീസ് വ്യക്തമാക്കുന്നു. ബ്രാഞ്ചിന് മുന്നില്‍ ഭീകരാന്തരീക്ഷം സൃഷ്ടിച്ചായിരുന്നു അതിക്രമം. രാവിലെ 11.30യോടെയാണ് സംഭവം. അതിക്രമം തടയാനെത്തിയ മറ്റൊരു സെക്യൂരിറ്റിക്കാരന് പരിക്കേറ്റിട്ടുണ്ട്. ഇയാളെ ആശുപത്രിയില്‍ പ്രവേശിപ്പിച്ചിരിക്കുകയാണ്. എടിഎമ്മില്‍ നിറക്കാനെത്തിയ പണം പെട്ടിയോടെയാണ് അക്രമികള്‍ തട്ടിയെടുത്തിരിക്കുന്നത്. കൂടുതല്‍ അന്വേഷണം നടത്തുമെന്നും അക്രമികള്‍ക്കായുള്ള അന്വേഷണം ഊര്‍ജിതമാക്കിയെന്നും ബീദര്‍ പൊലീസ് വ്യക്തമാക്കി.
