കോച്ച് എറിക് ടെന്‍ ഹാഗിനെ പുറത്താക്കിയതിന് പിന്നാലെ യുണൈറ്റഡിന് വമ്പന്‍ ജയം; സിറ്റിക്ക് ഞെട്ടിക്കുന്ന തോല്‍വി
ഇഎഫ്എല്‍ കപ്പ് നോക്കൗട്ട് റൗണ്ടില്‍ മാഞ്ചസ്റ്റര്‍ യുണൈറ്റഡ് ലെസ്റ്റര്‍ സിറ്റിയെ രണ്ടിനെതിരെ 5 ഗോളുകള്‍ക്ക് തോല്‍പ്പിച്ചു.
മാഞ്ചസ്റ്റര്‍: കോച്ച് എറിക് ടെന്‍ ഹാഗിനെ പുറത്താക്കിയതിന് പിന്നാലെ നടന്ന ആദ്യ മത്സരത്തില്‍ മാഞ്ചസ്റ്റര്‍ യുണൈറ്റഡിന് തകര്‍പ്പന്‍ ജയം. ഇടക്കാല പരിശീലകന്‍ റൂഡ് വാന്‍ നെസ്റ്റല്‍റൂയിക്ക് കീഴില്‍ ആദ്യമായി കളിക്കാനിറങ്ങിയ യുണൈറ്റഡ് ഇഎഫ്എല്‍(ഇംഗ്ലീഷ് ഫുട്‌ബോള്‍ ലീഗ്) കപ്പ് നോക്കൗട്ട് റൗണ്ടില്‍ ലെസ്റ്റര്‍ സിറ്റിയെ രണ്ടിനെതിരെ 5 ഗോളുകള്‍ക്ക് തോല്‍പ്പിച്ചു. ബ്രസീലിയന്‍ താരം കാസിമെറോ, പോര്‍ച്ചുഗീസ് സ്‌ട്രൈക്കര്‍ ബ്രൂണോ ഫെര്‍ണാണ്ടസ് എന്നിവര്‍ ഇരട്ട ഗോളുകള്‍ നേടി. 28- മിനുട്ടില്‍ ഗര്‍ണച്ചോയും യുണൈറ്റഡിനായി ഗോള്‍ നേടി. 33-ാം മിനിറ്റില്‍ ബിലാല്‍ എല്‍ ഖനൗസും ആദ്യ പകുതിയുടെ ഇഞ്ചുറി ടൈമില്‍ കോണോര്‍ കോഡിയുമാണ് ലെസ്റ്ററിന്റെ ഗോളുകള്‍ നേടിയത്. ആദ്യ പകുതിയിലാണ് മത്സരത്തിലെ ആറ് ഗോളുകളും പിറന്നത്.
മറ്റൊരു മത്സരത്തില്‍ ബ്രൈറ്റണെ രണ്ടിനെതിരെ മൂന്ന് ഗോളുകള്‍ക്ക് തോല്‍പ്പിച്ച ലിവര്‍പൂള്‍ ഇഎഫ്എല്‍ കപ്പ് ക്വാര്‍ട്ടര്‍ ഫൈനലിലേക്ക് മുന്നേറി.46,63 മിനുട്ടുകളില്‍ കോഡി ഗാക്‌പോയും 85- മിനുട്ടില്‍ ലൂയിസ് ഡയസുമാണ് ലിവര്‍പൂളിനായി ഗോളുകള്‍ നേടിയത്. 81ാം മിനിറ്റില്‍ സിമോണ്‍ അഡിന്‍ഗ്രയും 90-ാം മിനിറ്റില്‍ താരിഖ് ലാംപ്‌റ്റേയുമാണ് ബ്രൈറ്റന്റെ ഗോളുകള്‍ നേടിയത്.
ഇഎഫ്എല്‍ കപ്പിലെ മറ്റൊരു മത്സരത്തില്‍ കരുത്തരായ മാഞ്ചസ്റ്റര്‍ സിറ്റി ഞെട്ടിക്കുന്ന തോല്‍വി വഴങ്ങി. ടോട്ടന്‍ഹാം ഒന്നിനെതിരെ രണ്ട് ഗോളുകള്‍ക്കാണ് സിറ്റിയെ തോല്‍പ്പിച്ചത്. 5-ാം മിനുട്ടില്‍ ടിമോ വെര്‍ണറും 25- മിനുട്ടില്‍ പപ്പേ മാറ്ററുമാണ് ടോട്ടന്‍ഹാമിനായി ഗോളുകള്‍ നേടിയത്. ആദ്യ പകുതിയുടെ എക്‌സ്ട്രാ ടൈമില്‍ മാത്യുസ് ന്യുനസിലൂടെ സിറ്റി ഒരു ഗോള്‍ മടക്കി. എന്നാല്‍ രണ്ടാം പകുതിയില്‍ സമനില ഗോളിനായുള്ള സിറ്റിയുടെ ശ്രമങ്ങളൊന്നും വിജയം കണ്ടില്ല.
ഇഎഫ്എല്‍ കപ്പിലെ മറ്റൊരു മത്സരത്തില്‍ ആഴ്‌സണല്‍ തകര്‍പ്പന്‍ ജയം നേടി. പ്രെസ്റ്റണെ എതിരില്ലാത്ത മൂന്ന് ഗോളുകള്‍ക്കാണ് ആഴ്‌സണല്‍ തോല്‍പ്പിച്ചത്. 24- മിനുട്ടില്‍ ഗബ്രിയേല്‍ ജീസസ്, 33-ാം മിനുട്ടില്‍ ഏഥന്‍ ന്വനേരി, 58- മിനുട്ടില്‍ കായ് ഹാവേര്‍ട്‌സ് എന്നിവരാണ് ഗണ്ണേഴ്‌സിനായി ഗോളുകള്‍ സ്‌കോര്‍ ചെയ്തത്. ഇഎഫ്എല്‍ കപ്പില്‍ ആസ്റ്റണ്‍ വില്ല തോല്‍വി വഴങ്ങി. ക്രിസ്റ്റല്‍ പാലസ് ഒന്നിനെതിരെ രണ്ട് ഗോളുകള്‍ക്ക് ആസ്റ്റണ്‍ വില്ലയെ തോല്‍പ്പിച്ചു. ആദ്യ പകുതിയില്‍ ഇരു ടീമുകളും ഒരോ ഗോള്‍ വീതം നേടി ഒപ്പത്തിനൊപ്പം നിന്നു. 64- മിനുട്ടില്‍ ഡയിച്ചി കമാഡയാണ് ക്രിസ്റ്റല്‍ പാലസിന്റെ വിജയഗോള്‍ നേടിയത്
