കാസര്‍കോട് : ചെറുകിട കേബിള്‍ ടിവി ഓപ്പറേറ്റര്‍മാരെ പ്രതിസന്ധിയിലാക്കുന്ന കെ.എസ്.ഇ.ബി-യുടെ നിലപാടിനെതിരെ സംസ്ഥാനത്തെ വൈദ്യുതി ഭവനുകള്‍ക്ക് മുന്നില്‍ കേബിള്‍ ടിവി ഓപ്പറേറ്റേഴ്സ് അസോസിയേഷന്‍(സിഒഎ) നടത്തിയ സമരം ജനകീയ മുന്നേറ്റവും മുന്നറിയിപ്പുമായി മാറി. ഇതിന്റെ ഭാഗമായി സിഒഎ കാസര്‍കോട് ജില്ലാ കമ്മിറ്റി നേതൃത്വത്തില്‍ വിദ്യാനഗറിലെ ജില്ലാ വൈദ്യുതി ഭവനിലേക്ക് നടത്തിയ മാര്‍ച്ച സുനില്‍ ഗവാസ്‌ക്കറുടെ പേരിലുള്ള റോഡില്‍ നിന്നും ആരംഭിച്ചു. വിവിധ ആവശ്യങ്ങള്‍ ഉന്നയിച്ച് കൊണ്ടുള്ള പ്രതിഷേധ ബോര്‍ഡും കൈയ്യിലേന്തി നീങ്ങിയ മാര്‍ച്ച് വൈദുതി ഭവന് മുന്നില്‍ സമാപിച്ചു. തുടര്‍ന്ന് സമര വൊളണ്ടീയര്‍മാര്‍ ഓഫീസിന് മുന്നില്‍ പ്രതിഷേധ ബോര്‍ഡും സ്ഥാപിച്ചു.
ഓഫീസിന് മുന്നില്‍ ചേര്‍ന്ന പ്രതിഷേധ യോഗം സിഒഎ സംസ്ഥാന കമ്മിറ്റി അംഗം എം.ലോഹിതാക്ഷന്‍ ഉദ്ഘാടനം ചെയ്തു. ജില്ലാ പ്രസിഡണ്ട് വി.വി മനോജ് കുമാര്‍ അദ്ധ്യക്ഷനായി. സംസ്ഥാന കമ്മിറ്റി അംഗങ്ങളായ ഷുക്കൂര്‍ കോളിക്കര, സതീഷ് കെ പാക്കം, സിസിഎന്‍ ചെയര്‍മാന്‍ കെ.പ്രദീപ് കുമാര്‍ എന്നിവര്‍ സംസാരിച്ചു. കാസര്‍ഗോഡ് മേഖലാ സെക്രട്ടറി പാര്‍ത്ഥസാരഥി സ്വാഗതവും ജില്ലാ ട്രഷറര്‍ പി.വിനോദ് നന്ദിയും പറഞ്ഞു.
തുടര്‍ന്ന് കെഎസ്ഇബി ഡെപ്യൂട്ടി ചീഫ് എന്‍ജിനീയര്‍ എസ്.ബി സുരേഷ് ബാബുവിന് നിവേദനവും കൈമാറി. നിവേദനം വൈദ്യുതി ബോഡിലെ ഉന്നതാധികാരികളുടെ ശ്രദ്ധയില്‍ കൊണ്ടുവരുന്നതിനും പരമാവധി സഹായം ലഭ്യമാക്കുന്നതിന് ആവശ്യമായ ഇടപെടല്‍ നടത്താമെന്ന് അദ്ദേഹം സമരക്കാര്‍ക്ക് ഉറപ്പ് നല്‍കി.
കേബിള്‍ ടിവി, ബ്രോഡ്ബാന്‍ഡ്് വൈദ്യുതി പോസ്റ്റ് വാടക പിന്‍വലിക്കുക, ഒന്നില്‍ കൂടുതല്‍ കേബിളുികള്‍ക്ക് പ്രത്യേക നിരക്ക് തീരുമാനം പിന്‍വലിക്കുക, കേന്ദ്ര സര്‍ക്കാര്‍ റൈറ്റ് ഓഫ് വേ നിര്‍ദ്ദേശം കേബിള്‍ ടിവിക്ക് കൂടി ബാധകമാക്കുക, ഇന്റര്‍നെറ്റ് അവകാശമായി പ്രഖ്യാപിച്ച് പാവപ്പെട്ടവര്‍ക്ക് നല്‍കുന്ന കെ-ഫോണ്‍ സൗജന്യ കണക്ഷനുകള്‍ക്ക് പോസ്റ്റ് വാടക ഒഴിവാക്കുക, കെ-ഫോണ്‍ ഫൈബര്‍ അനുവദിക്കുന്നതിലെ കാലതാമസവും വിവേചനവും അവസാനിപ്പിക്കുക, ചെറുകിട സംരംഭകരോടുള്ള അവഗണന അവസാനിപ്പിക്കുക എന്നീ ആവശ്യങ്ങളാണ് സിഒഎ സമരത്തിലൂടെ പ്രധാനമായും മുന്നോട്ടുവെച്ചത്.
സിഒഎ ജില്ലാ കമ്മിറ്റി അംഗങ്ങളായ കെ.ദിവാകര, പുരുഷോത്തം നായിക്, പി.കെ മനോജ് കുമാര്‍, സുധീഷ്, നീലേശ്വരം മേഖലാ പ്രസിഡണ്ട് ശ്രീധരന്‍ വെള്ളച്ചാല്‍, സിഒഎ കാഞ്ഞങ്ങാട് മേഖലാ സെക്രട്ടറി പ്രകാശന്‍, നീലേശ്വരം മേഖലാ സെക്രട്ടറി സി.പി ബൈജുരാജ്, കാസര്‍കോട് മേഖലാ ട്രെഷറര്‍ ചിത്ര.ജി തുടങ്ങിയവര്‍ മാര്‍ച്ചിന് നേതൃത്വം നല്‍കി.
സിഒഎ-യുടെ വൈദ്യുതി ഭവന് മാര്‍ച്ച്മുന്നേറ്റവും മുന്നറിയിപ്പുമായി മാറി
21
