ഓറഞ്ച് ക്യാപ്; റണ്‍വേട്ടയില്‍ കുതിച്ചുകയറി കോലി

ബെംഗളൂരു: ഐപിഎല്‍ പതിനെട്ടാം എഡിഷനില്‍ ബെംഗളൂരുവിനായി തകര്‍പ്പന്‍ പ്രകടനം തുടരുകയാണ് വിരാട് കോലി. കഴിഞ്ഞ ദിവസം രാജസ്ഥാന്‍ റോയല്‍സിനെതിരെ കോലി 42 പന്തില്‍ 70 റണ്‍സെടുത്താണ് മടങ്ങിയത്. 32 പന്തില്‍ നിന്നാണ് കോലി രാജസ്ഥാനെതിരെ അര്‍ധ സെഞ്ച്വറി കുറിച്ചത്. 8 ബൗണ്ടറിയും 2 സിക്‌സും അടങ്ങുന്ന ക്ലാസിക് ഇന്നിംഗ്‌സ്. ഈ ഐപിഎല്‍ സീസണിലെ അഞ്ചാമത്തെ അര്‍ധ സെഞ്ച്വറിയാണ് കോലി നേടിയത്.
18-ാം സീസണിലെ റണ്‍വേട്ടക്കാരില്‍ കിംഗ് കോലി മുന്നില്‍ തന്നെയുണ്ട്. 9 മത്സരങ്ങളില്‍ നിന്ന് 65.33 ശരാശരിയില്‍ 392 റണ്‍സുമായി രണ്ടാം സ്ഥാനത്ത്. 8 മത്സരങ്ങളില്‍ നിന്ന് 52.12 ശരാശരിയില്‍ 417 റണ്‍സ് നേടിയ ഗുജറാത്ത് ടൈറ്റന്‍സ് താരം സായ് സുദര്‍ശന്‍ മാത്രമാണ് ഇനി കോലിയ്ക്ക് മുന്നിലുള്ളത്. 9 മത്സരങ്ങളില്‍ നിന്ന് 47.12 ശരാശരിയില്‍ 377 റണ്‍സ് നേടിയ ലക്‌നൗ സൂപ്പര്‍ ജയന്റ്‌സ് താരം നിക്കോളാസ് പൂരാനാണ് കോലിയ്ക്ക് പിന്നില്‍ മൂന്നാമത്. മുംബൈ ഇന്ത്യന്‍സിന്റെ സൂര്യകുമാര്‍ യാദവ് 9 മത്സരങ്ങളില്‍ നിന്ന് 62.16 ശരാശരിയില്‍ 377 റണ്‍സുമായി നാലാം സ്ഥാനത്തുണ്ട്. 9 മത്സരങ്ങളില്‍ നിന്ന് 39.55 ശരാശരിയില്‍ 356 റണ്‍സ് നേടിയ രാജസ്ഥാന്‍ റോയല്‍സ് താരം യശസ്വി ജയ്‌സ്വാളാണ് ഓറഞ്ച് ക്യാപ് പോരാട്ടത്തില്‍ അഞ്ചാം സ്ഥാനത്ത്.