യു.എ.ഇയിലെ പ്രധാന വ്യവസായ സ്ഥാപനങ്ങളുടെ പ്രതിനിധികള് ഉള്പ്പെടുന്ന സംഘവും മന്ത്രിക്കൊപ്പം ഉണ്ടാകും.
കേരള സര്ക്കാര് സംഘടിപ്പിക്കുന്ന ഇന്വെസ്റ്റ് കേരള ഗ്ലോബല് സമ്മിറ്റില് യു.എ.ഇ സാമ്പത്തികകാര്യ മന്ത്രി ഹിസ് എക്സലന്സി അബ്ദുള്ള ബിന് തൗഖ് അല് മാരി മുഖ്യാതിഥിമാരിലൊരാളായി പങ്കെടുക്കും. ഇന്ന് അദ്ദേഹവുമായി നടത്തിയ കൂടിക്കാഴ്ചയിലാണ് കേരളത്തിന്റെ ക്ഷണം സ്വീകരിച്ചുകൊണ്ടുള്ള ഉറപ്പ് ലഭ്യമായത്. യു.എ.ഇയിലെ പ്രധാന വ്യവസായ സ്ഥാപനങ്ങളുടെ പ്രതിനിധികള് ഉള്പ്പെടുന്ന സംഘവും മന്ത്രിക്കൊപ്പം ഉണ്ടാകും. പ്രമുഖ വ്യവസായിയും ലുലു ഫിനാന്ഷ്യല് ഹോള്ഡിംഗ്സ് എം.ഡിയുമായ അദീബ് അഹമ്മദും ഇന്നത്തെ കൂടിക്കാഴ്ചയില് പങ്കെടുത്തു.
കേരളത്തില് ലോജിസ്റ്റിക്സ്, ഭക്ഷ്യ സംസ്കരണം തുടങ്ങിയ മേഖലകളില് കൂടുതല് നിക്ഷേപത്തിന് താല്പര്യമുള്ളതായി യു.എ.ഇ മിനിസ്റ്റര് ഓഫ് ഇന്വെസ്റ്റ്മെന്റ് മുഹമ്മദ് ഹസന് അല് സുവൈദി ഇന്നലെ പറഞ്ഞിരുന്നു. ഐ.കെ.ജി.എസില് പങ്കെടുക്കുന്ന പ്രത്യേക സംഘം ഇക്കാര്യങ്ങള് വിലയിരുത്തും. അബുദാബി ചേംബര് ഓഫ് കോമേഴ്സും നിക്ഷേപക സംഗമത്തിന് പ്രത്യേക സംഘത്തെ അയക്കുമെന്ന് വ്യവസായ മന്ത്രി പി.രാജീവിനെ അറിയിച്ചു. ഐ.കെ.ജി.എസിന് മുന്പായി പ്രാഥമിക പരിശോധനകള്ക്കായി ചേംബറിന്റെ ഉദ്യോഗസ്ഥ സംഘത്തെ കേരളത്തിലേക്ക് അയക്കും. ലഭ്യമായ സ്ഥലങ്ങള് പരിശോധിക്കുന്നതിനും നിക്ഷേപ മേഖലകള് വിലയിരുത്തുന്നതിനുമാണ് ഉദ്യോഗസ്ഥ സംഘത്തെ അയക്കുന്നത്. ചേംബര് ഓഫ് കോമേഴ്സ് ചെയര്മാനും ഡിപ്പാര്ട്ട്മെന്റ് ഓഫ് ഇക്കണോമിക് ഡവലപ്മെന്റ് തലവനുമായ അഹമ്മദ് ജാസിം, ഫസ്റ്റ് വൈസ് ചെയര്മാന് ഡോ. സഈദ് ബിന് ഹര്മാല് അല് ദഹേരി, സെക്കന്റ് വൈസ് ചെയര്മാന് ഡോ. ഷാമിസ് അലി ഖല്ഫാന് അല് ദഹേരി എന്നിവരും കൂടിക്കാഴ്ചയില് പങ്കെടുത്തു.
രണ്ടു ദിവസത്തെ ദുബായ് ഇന്വെസ്റ്റര് മീറ്റിലും റോഡ് ഷോയിലുമായി പ്രധാന വ്യവസായികള്, വാണിജ്യ സംഘടനകള് എന്നിവരുമായി കൂടിക്കാഴ്ചയും ചര്ച്ചകളും നടക്കും. വ്യവസായ മന്ത്രി പി.രാജീവ്, ലുലു ഗ്രൂപ്പ് ചെയര്മാന് എം.എ യൂസഫലി, വ്യവസായ വകുപ്പ് പ്രിന്സിപ്പല് സെക്രട്ടറി എ.പി.എ മുഹമ്മദ് ഹനീഷ്, കെ.എസ്.ഐഡി.സി എം.ഡി എസ് ഹരികിഷോര്, ഒ. എസ്.ഡി ആനി ജൂല തോമസ് തുടങ്ങിയവരും പരിപാടികളില് പങ്കെടുത്തു.